مغامرة ريمية

تحذير: هذه التدوينة غير مفيدة بالمرة ويمكن ما تضحكش أي حد خالص, بس أنا عن نفسي بموت من الضحك كل ما أفتكر الموقف
فلو دمك تقيل أحسنلك ما تقراش
:D

هاحكيلكوا حكاية كنت حاكتها قبل كده على تويتر بس مش بالتفصيل ده.. دي مغامرة من مغامرات أولى ثانوي
السنة اللي كنت فيها أكتر تلميذة مشاغبة في العالم كله
بس بـنوع من الكوميديا
:D

مرة كنت وصلت المدرسة متأخر
والحصة الأولى بدأت والناظرة كانت كل يوم تشوفني وأنا رايحة متأخر وآخر مرة قالتلي لو جيتي متأخر تاني هعملك لفت نظر أو حاجة كده

المهم طلعت بقى بجري ولابسة الشنطة على ضهري وأول ما وصلت للدور بتاعنا.. وفصلنا كان جنب السلم على طول خبط لزق.. أول ما تطلع السلم على إيدك اليمين ..قمت وطيت كده شوية جنب السلم واتداريت في الحيطة, أشوف الدنيا اخبارها إيه والناظرة موجودة في الدور ولا لأ ..

المهم لقيتها موجودة وبتقرب وأنا مش عارفة أعمل إيه
هتشوفني على السلم .. ولو دخلت الفصل هتشوفني وانا داخلة متأخر بالشنطة على ضهري

قمت واخدة نفس جامد أوي .. ورجعت لورا وقمت داخلة بسرعة جدا بـسرعة البرق على الفصل .. وحتى مدخلتش مشي على الأقدام.. واللهِ طرت

فتحت الباب بـقوة رهيبة وقمت ناطة على الأرض .. وفضلت في الأرض شوية عشان الناظرة كانت بتلف في الدور .. واحنا فصلنا فيه إزاز بيطل على الكوريدور

المهم .. احنا جنبنا في أوضة إزاز كده لازقة في الفصل برضو
احنا موقع فصلنا كان استراتيجي

المهم الأوضة دي بيقعد فيها المشرفات
كان فيها اتنين مشرفات.. فطسوا على روحهم من الضحك
وهم بره الفصل.. ولقيتهم بيطلوا عليَّ من إزاز الفصل من بره .. بيشوفوا أنا باعمل إيه وحصلي إيه جوه وانا نايمة على الأرض كده على وشي

وفطسانين من الضحك طبعا .. بجد واللهِ وشهم إحمر ودمعوا

ومن ساعتها بيحبوني جدا وحتى في ثانوية عامة كانوا بيكتبوا إسمي في الحضور من غير ما اقولهم ..
-بغض النظر التصرف ده صح ولا لأ بس أنا نفسي مكنتش أعرف ده-
عشان كنت بغيب عشان الدروس وكده
وعرفت إنهم بيكتبوني حضور عشان صحابي اللي ماكانوش بيروحوا جالهم جوابات انذار وانا لأ

والحكاية بقت على كل لسان وكل الدور بيضحك عليَّ بعدها

ننتقل للمشهد جوه الفصل بعد ما حصل كده

طبعا أنا دخلت اترميت على الأرض
البنات كلهم صرخوا في الأول وكل واحدة بسم الله الرحمن الرحيم وصريخ وحاجات كده

بعد ما إتخضوا .. كلهم ماتوا من الضحك

أما بالنسبة للمدرس
قعد يزعقلي ويقولي إيه اللي إنتي عملتيه ده .. إنتي اتجننتي
في حد بيجري وراكي ولا إيه

المهم بعد كل ده الناظرة دخلت شافتني .. ملحقتش.. والشنطة على ضهري.. وزعقتلي إني جيت متأخر

فشلت المهمة
وطلعت من المولد بلا حمص

النهاية

:D

مثال حي:

About these ads

6 Comments

  1. هههههههههههههههههههههه
    مش منكن

    انا اللى قلبنى على ضهرى من الضحك
    ان بعد كل العذاب داا
    برضة شااافتك

    فكرتيتى بأيام المدرسة
    اينعم كاانت فى مصر
    و اينعم الشبابيك كانت من غير ازاز اصلااا

    بس كانت ايام حلوة اوووووووى
    شجعتينى احكى فضاايحى انا كمان :D

    • لووووول تخيلي
      ولا كأني عملت حاجة

      على فكرة أنا كنت في مدرسة في القاهرة!
      أنا طول عمري عايشة في القاهرة ومصرية يعني :D :D

      لما تكتبي عن الفضايح هكون أول قارئة إن شاء الله
      :D

  2. موقف محرج اوي :)
    بس اديها نجربة :)
    احنا عندنا فالمدرسة بيدخلوا العيال الشقية متأخر وكدة
    ييجو عليا انا اول مرة اتأخر يمسكوا فيا بس بعدي برضو :)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s